Koneksyon Chelsea Everett Greenway a
Pou kreye yon plan pou nouvo koridò natirèl rekreyatif Greenway a k ap soti nan fen Chelsea Greenway pou rive nan Encore Casino a, santye Northern Strand Trail la, ak pi lwen.
Chelsea Everett Greenway | Photo Credit: MAPC
Konsèy Planifikasyon Zòn Metwopoliten an (Metropolitan Area Planning Council, MAPC) , an patenarya avèk Vil Chelsea ak Vil Everett, ap travay pou konekte koridò natirèl rekreyatif Koridò Vèt Chelsea (Chelsea Greenway) ak Wout Kominotè Northern Strand (Northern Strand Community Trail) ansanm ak zòn Encore Casino a. Nou defini tèm “greenway” la, nan sans jeneral li, kòm yon koridò ki fèt pou mache, monte bisiklèt, ak transpò sou woulèt, ki separe fizikman ak sikilasyon machin yo. Lè nou di “transpò sou woulèt,” nou vle di lòt kalite mwayen mobilite pèsonèl ki genyen wou, anplis bisiklèt, tankou, men ki pa sèlman, chèz woulant, wokè , skoutè (scooters), ak planch a wou (skateboards).
Premye faz etid Wout Koridò Vèt Chelsea–Everett (Chelsea Everett Greenway Connector) la te fini nan mwa novanm 2025. MAPC ansanm ak vil Chelsea ak Everett te fè yon analiz altènativ pou idantifye pi bon fason, ki ap kapab amelyore konektivite, ogmante aksè a transpò pou rezidan yo, amelyore sekirite pou moun ki ap monte bisiklèt ak pyeton, diminye enpak nouvo devlopman yo sou sikilasyon ak kalite lè moun ap respire, epi sipòte planifikasyon alavni pou rezo transpò aktif yo. Yon pati nan analiz altènativ sa a te finanse gras ak yon sibvansyon Komisyon Jwèt aza Massachusetts la (Massachusetts Gaming Commission).
Pou kreye conector (wout koneksyon an), yo te analize de zòn: premye a soti nan Koridò Vèt Chelsea sou Chestnut Street rive Mystic Mall (Chelsea), epi dezyèm nan soti Mystic Mall (Chelsea) rive Encore Casino ak Wout Kominotè Northern Strand (Everett). Yo te konsidere diferan kalite enfrastrikti, tankou wout moun itilize an komen, liy bisiklèt ki separe ak twotwa, ansanm ak liy bisiklèt ki sou lari a.
Etid la te genyen ladan l rankont ak gwoup kominotè yo pou ranmase lide sou wout yo ak karakteristik konsepsyon yo. Ekip etid la te pale ak MassDOT ak MBTA konsènan opsyon wout yo ak fason pou konsevwa yon wout ki konekte ak sèvis tren ak Silver Line yo pral devlope yo.
Finalman, ekip ki t ap fè etid la te chwazi yon wout yo prefere pou aplike nan yon delè kout (gade kat la), paske li gen pi bon karakteristik sekirite, li bay yon koneksyon ki pi dirèk, li genyen mwens enpak, epi pri li pi rezonab. Wout prefere sa a genyen kèk seksyon ki deja konstwi oswa ki deja nan pwosesis devlopman, sa ki pral pèmèt pwojè a fini nan yon delè ki pi kout. Sepandan, etid la te detèmine tou ke prèske tout wout yo te analize yo reprezante yon bon opsyon pou amelyorasyon alavni, epi yo kapab fè pati yon rezo greenway, wout pou itilizasyon pataje, wout bisiklèt, ak twotwa amelyore ki pi laj nan Chelsea ak Everett.
MassDOT pral konsevwa epi finanse seksyon Spruce Street la (gade kat la) apa. Ekip etid la rekòmande yon wout pou itilizasyon pataje pou seksyon sa a, byenke yo ap konsidere yon liy bisiklèt pwoteje ansanm ak twotwa yo tou.
Men pwochen etap ki nan pwosesis sa a :
- Kòmanse konsepsyon preliminè pou zòn ki konekte Koridò Vèt Chelsea ak Spruce Street. Etap sa a ap genyen ladan l yon nouvo evalyasyon sou wout ki nan Chelsea yo pou konfime si yo apwopriye. Pwochen faz sa a ap genyen ladan l tou reyinyon piblik epi li pral fèt pandan ane 2026 ak 2027.
- Evalye diferan opsyon pou konekte ak Casino a ak Wout Kominotè Northern Strand nan Everett pandan pwojè redevlopman yo ap fèt, tankou agrandisman Casino a, Inovasyon nan Distri Docklands (Everett Docklands Innovation District) la, ak nouvo estad foutbòl la.
Ou kapab telechaje rapò Analiz Altènativ 2025 la isit la.
Paj entènèt sa a ap gen mizajou pandan etid la ak konsepsyon an ap pwogrese.
Ou gen kesyon?
Travis Pollack (Direktè Pwojè)
[email protected]
(617) 933-0793
David Loutzenheiser
[email protected]
(617) 933-0743
Kontèks
Zòn ki ozalantou Encore Casino nan Everett ak Chelsea kontinye ap evolye soti nan yon zòn ki te itilize sitou pou transpò machandiz, lojistik ak espas endistriyèl pou vin tounen yon zòn ki gen plis devlopman pou itilizasyon melanje (sa yo rele "mixed-use" nan kontèks planifikasyon zonaj) ki pral bay nouvo opsyon pou magazen, lojman, espas biwo, ak amizman.
Sepandan, yo pa t janm adapte rezo wout ki egziste deja yo pou chanjman peyizaj sa a, patikilyèman wout ki relye zòn ès ak lwès yo ki soti nan Chelsea ak Everett ak zòn kazino a. Sikilasyon machin la ogmante plis toujou nan menm lari ak otowout yo ki te deja chaje ak trafik, epi aksè san danje pou bisiklèt ak pyeton yo limite anpil nan Chelsea rive nan Encore.
Defi sekirite sa a pi difisil toujou pandan peryòd gwo trafik la nan maten ak apremidi ak pandan gwo evènman nan kazino a, lè Wout 16 ak 99 yo gen gwo anbouteyaj, epi sèl lòt ti wout lokal ki relye zòn ès ak lwès la (Beacham Street) deja itilize anpil pou transpò machandiz. Anplis, opsyon transpò soti nan Chelsea pou ale nan kazino a ka pran plis pase yon èdtan pou rive, pafwa ak plizyè koneksyon otobis.
An 2023, MAPC te aplike pou e li te resevwa yon Sibvansyon Pou Mitigasyon Kominotè (Community Mitigation Grant) nan men Massachusetts Gaming Commission pou jwenn sèvis konsiltasyon pou fè yon analiz opsyon yo pou idantifye pi bon aliyman an oswa aliyman yo, pou konekte fen koridò natirèl rekreyatif Chelsea Greenway a nan Chestnut Street nan vil Chelsea ak Broadway ( Route 99) nan Everett ak santye Northern Strand Trail la.
Kat ki anba a montre pwen apwoksimatif kote pwojè a pra l kòmanse ak fini, ansanm ak koridò natirèl rekreyatif ki deja egziste ak sa k ap vini yo, liy pou bisiklèt, ak santye nan zòn nan
Kat sa a montre rezo santye enkonplè nan Chelsea ak Everett. Koridò natirèl rekreyatif Chelsea Greenway ki egziste deja a fini nan lès Route 1, ki nan yon distans plis pase 2 mil de Encore Boston ak santye Northern Strand Trail la. Liy solid la montre santye ak chemen ki egziste deja (vèt ak wouj), ak liy bisiklèt yo (ble). Liy tirè yo montre wout potansyèl yo, konsepsyon ak kote yo dwe detèmine.
Lòt pwojè ak resous anrapò ak pwojè a
Lyen annapre yo mennen nan lòt pwojè ak pwogram transpò nan zòn etid la.
Landline
LandLine se vizyon MAPC pou konekte koridò natirèl rekreyatif ak santye nou yo pou fè yon sèl rezo. Plan an te devlope an kowòdinasyon ak LandLine Coalition, yon gwoup 40 volontè ki reprezante yon kantite ajans lokal ak gwoup defans.
Depatman transpò Vil Everett la
Depatman transpò Vil Everett la, (City of Everett Transportation and Mobility Department) antreprann plizyè inisyativ planifikasyon ak pwojè pou enfrastrikti fizik Vil la.
Paj Depatman lojman, devloman kominotè, infrastrikti ak mobilite vil Chelsea
Paj Depatman lojman, devloman kominotè, infrastrikti ak mobilite vil Chelsea, (City of Chelsea Department of Housing and Community Development, Infrastructure and Mobility) gen landan l lyen pou plizyè pwojè transpò ki genyen nan vil Chelsea.
Pwojè ekstansyon liy otobis gri a
Pwojè ekstansyon liy otobis gri a (MBTA Silver Line Extension), se plan MBTA (Autorite transpò an komen pou Massachussets pou ralonje sikwi rapid tranpò bis la (Bus Rapid Transit) pou l travèse Cheslea ak Everett rive nan plas Sullivan Square.